Mar 30, 2011
الرئيس اللى جاى
الصفة الاولى أو الأمنية الاولى التى يجب ان تتواجد فى شخصية الرئيس القادم هى الثقافة و بالتأكيد الثقافة اهم صفة يجب ان تتواجد فى رئيس دولة فى هذا العصر و دولة من المفترض اننا نبدأ بنائها من جديد ( مش زى البطيخة اللى كانت بتحكمنا من 30 سنة, ابو 50 % فى ثانوية عامة اللى انا متأكد ان عمر امه ما قرا كتاب يوحِّد ربنا فى حياته الغبية دى ) و يكون عنده ثقافة الحوار البناء ( مش طريقة الحوار بتاعة عمر سليمان) و يقبل نقد الشعب او الصحافة و ان يحترم فكر كل التيارات السياسية الموجودة على الساحة و ان تكون عنده ثقافة الرأى و الرأى الاخر و اهم شىء ان يكون عنده ثقافة الثورة ( عارف يعنى ايه ثورة و يشيل كلمة قلة مندسة من قاموسه ) هذا بالنسبة للناحية الثقافية .
من الناحية العلمية , يجب يهتم بالبحث العلمى و قبل البحث العلمى يجب ان يهتم يالتعليم فى الابتدائى ( و كفايانا تخلف و غباء اظن 30 سنة جهل و تخلف كفاية اوى و يخللى المدارس شكلها حلو كدا علشان العيال نفسها تنشرح و يتعلموا بجد ) و ينفق ميزانية ضخمة على التعليم و البحث العلمى ( ميبقاش زى الحمار الى كان بيحكمنا الى كان بيطلع الاخير على دفعته دايما ) و ( يسمع للعيال الغلابة بتوع ثانوية عامة و يحاول يحارب الدروس الخصوصية مش لازم يوكل الوزير بالنيابة عنه و يكون عارف هو ايه اللى كان بيدايقه و بيحرق دمه ايام المدرسة و الجامعة و يغيره ) و اهم شىء فى الموضوع كله " يخللى دار الشروق هى اللى تطبع الكتب للعيال " .
و من ناحية التواصل الالكترونى مع الشعب ياريت يكون عنده تويتر و يرد على الناس لما تكلمه و لو حد اتخنق منه يعمله بلوك عادى و ياريت يشارك مهانا فى هاشتاج "نكت قبيحة" و يشتم اللى مش عاجبه عادى جدا زى ما كلنا بنعمل و يتريق على الناس زينا و يكون كمان عنده فيس بوك اكونت و يبقاله بروفايل مش بيدج و يخليه مسموح لكل الناس تضيفه مش " برايفت " و يبقى فاتح الشات و يكلم الناس عادى و يكتب بالفرانكو زينا .
من المؤكد ان تكون شخصيته قيادية و ليست " دكتاتورية " فالقيادة تعنى اتخاذ القرارات المناسبة فى الاوقات المناسبة و ليست " عنترية " ( يعنى مش زى صاحبنا الغبى اللى مكانش بيعرف ياخد قرار لواحده بس و الله ربنا اللى كان بيسترها معانا ) ان يكون لديه مهارات السادات فى القيادة و يبتعد عن دكتاتوريته و ان يؤمن بالأية الكريمة " و أمرهم شورى بينهم " ( يعنى هيحصل ايه لو استشار اللى حواليه , اجدع منه و بيعملوا كدا ) .
حاجات تانية كدا لازم تكون موجودة فى الرئيس اللى جاى , يعنى يكون بيفطر فول و طعمية زينا و بيشرب من نفس المية اللى جايبالنا امراض يعنى مش معنى انه بقى رئيس هيتنطط علينا و يجيب اكله من برا زى المخلوع و يصلى يوم الجمعة مع الناس بالجلابية زى كل الناس العاديين ما بتصلى و ينزل يصلى العيد برده بالجلابية و ينزل يصلى فى رمضان و يتسحر فول و طعمية برده , و نفسى يمشى فى الشارع من غير حراسة لانه بالتأكيد لو خللى الناس تحبه اكيد مش هيحتاج حراسة , لازم يلبس بدلة صناعة مصرية حتى " اللباس " صناعة مصرية عشان يشجع صناعة بلده و يخلينا نلبس من صنع بلدنا .
لازم يقف فى الطابور زينا و تسلم عليه كدا و انت واقف جنبه " ازيك يا ريس و اخبار المدام و الاولاد ايه " و عشان خاطرى يا ريت ما يبقاش اسم ابنه جمال لاننى ممكن اعمل ثورة بسبب الاسم دا و ياريت كمان المدام ميبقاش ليها دعوة بأم السياسة يعنى تبقى زى زوجة اوباما قاعدة فى البيت تطبخله و تربى ولاده و لو كانت كبيرة شوية تفتح ملجأ اطفال و لا جمعية خيرية .
نفسى يهتم بالعلاقات الدولية و يكون فى تبادل ثقافى و تجارى بيننا و بين الدول التانية منبقاش منعزلين عن العالم الخارجى , و ياريت يا سيادة الرئيس القادم تهتم بالقضية الفلسطينية و بالعلاقات العربية و لو اى مصرى قاعد برة اشتكى من اى حاجة حقه يجيله وقتى احنا عايزين كارمة المصرى فوق كل اعتبار .
دى بعض تطلعاتى للرئيس القادم و ياريت كل واحد مننا يكون له احلام فى الرئيس اللى جاى ..... .
Mar 29, 2011
هنزل الجمعة
هنزل يوم الجمعة علشان اعرف المجلس العسكرى ان الثورة لسة مستمرة و اننا هننقذ الثورة .
هنزل يوم الجمعة علشان حاسس ان البلد مبتتحركش و اننا رجعنا تانى لعصر ما قبل الثورة .
هنزل يوم الجمعة لانى حاسس بحالة ركود و تباطؤ من الحكومة و المجلس العسكرى .
هنزل يوم الجمعة لان اهالى الشهداء لسة مأخدوش تعويضات لحد دلوقتى .
هنزل يوم الجمعة لأطالب بأن حسنى مبارك لازم يتحاكم فى الميدان .
هنزل يوم الجمعة لأطالب باسترداد اموالنا من الخارج .
لو فى سبب تانى تنزل علشانه ياريت تنزل .
Mar 27, 2011
دستور يا اسيادنا
" الدستور عبارة عن بناء هندسى للحياة السياسية "
" ودنك منين يا جحا " المثل واضح و مفهوم , لكن لماذا لا يعى المجلس الاعلى للقوات المسلحة معنى هذا المثل , و لماذا يريد ادخالنا فى مهاترات ليس لها اى فائدة سوى انها مضيعة للوقت , انتم تعرفون عما اتحدث انه " الدستور " حديث الساعة الان فى اى تجمعات او اى حوارات و ذلك لاننا فى فترة فراغ سياسى او بالأصح فراغ " دستورى " فمن المعروف ان الثورة تطيح بالدستور السابق لها , و لان سبب قيام كل الثورات هو الاحتجاج على نظام الحكم الذى يحكم وفقا للدستور فأن كل ثورة يعقبها دستور جديد يعبر عن مطالبها و عن حقوق شعبها .
نرجع الى مرجوعنا " ودن جحا " , و قد سمعت ان الانتخابات الرئاسية سيتم اجرائها فى شهر يونيو من العام القادم بعيدا عن اعتراضى على وجود رئيس للجمهورية او مجلس شعب و شورى او اى مؤسسات مدنية من دون دستور , فالسؤال يطرح نفسه : لماذا تم الاستفتاء على مواد معدلة من دستور ساقط و فى حين اذا قلنا نعم او لا ستجرى الانتخابات الرئاسية فى العام القادم و لماذا تم الاستفتاء بهذه السرعة ؟ و كان من الممكن ان يتم عمل اعلان دستورى و يعقبه دستور جديد ثم تأتى كل المؤسسات و المجالس المحلية و الرئيس الجديد و يسيروا وفقا للدستور الجديد .
و فى حوار له على قناة دريم ذكر الفقيه الدستورى د/ ابراهيم درويش انه كان يلزم وضع اعلان دستورى و لا حاجة للاستفتاء و على حد تعبيره " الاعلان الدستورى معناه ان حصل ثورة و بيتكون من عدة مواد لادارة شئون البلاد للعبور الى الاستقرار بنظام سياسى بدستور جديد " كلام زى الفل و انا اتفق تماما مع الرجل و اى انسان عنده ذرة عقل سيكون متفق معه فنحن لم نستفيد من هذه التعديلات بل كان من الممكن اجراء اعلان دستورى يقولنا فى هذه المرحلة ولا فاءدة من انقسام الصفوف بين ابناء الشعب .
" اللجنة لم تكن على مستوى الحدث " هكذا وصف لجنة وضع التعديلات الدستورية و قال ان وضع دستور جديد لا بد ان يكون به نخبة من المفكرين و يشرف عليهم مجموعة من القانونيين , و تأتى المفاجأة فالمجلس الاعلى لم يختار نخبة من القوى السياسية و انما اختار شخص من جماعة الاخوان المسلمين و هو " صبحى صالح " فقط فكيف يفعل المجلس الاعلى هذه الحادثة التى تعتبر اقصاء لجميع القوى السياسية فى مرحلة من المفترض لها ان تكون ديمقراطية اكثر من اى وقت مضى لأنها تخلف الثورة .
و بذكر " صبحى صالح " الخبير الدستورى , يتوجب على ان اقول لكم اننى قد حضرت له مؤتمرا فى جامعة المنصورة قبل موعد الاستفتاء حيث نظم طلبة الاخوان المسلمون هذا المؤتمر و اى انسان عاقل طبعا من المفترض ان عضو اللجنة التأسيسية يجب ان يكون محايد فى مسألة "نعم" او "لا" و لكن الغريب ان هذا الخبير الدستورى كان يدعو الشباب الى ان يقولوا نعم للاستفتاء فكيف يكون مثل هذا الشخص من اللجنة التأسيسية التى وضعت التعديلات .
كما ذكر د/ ابراهيم درويش " اعتقاد ان هذه التعديلات تقود للاستقرار هو خطأ كبير " غير انه علق على نتيجة الاستفتاء قائلا " نسبة 77% دى فيها كلام كتير " لقد تحدثت من قبل عن ان الكوسة مازالت موجودة فى ظل الاحداث الجارية و لكننى اريد ان اسأل الاخوان المسلمون و باقى الذين صوتوا بنعم هل ما يحدث الان هو الاستقرار المنشود ام ستة انتخابات فى الفترة المقبلة تؤدى للاستقرار ؟ .
فى حين ان تدخل المجلس العسكرى فى تعديل المادة 93 دون الرجوع الى اللجنة يعيدنا الى زمن المخلوع ثانية و هو شىء غير مقبول على الاطلاق و لا اعرف ماذا يخطط العسكر و لا اعرف نواياهم و لكن الشىء الوحيد الذى اعرفه هو اننى لازلت متمسك بهم و لازلت احبهم و اريد منهم البقاء حتى تستقر البلاد و حتى نشكل دستور جديد يسير عليه كل من يأتى فى الحكم و تسير عليه كل المجالس النيابية و المحلية .
Mar 26, 2011
يامصر هانت وبانت كلها كام يوم... نهارنا نادي ونهار الندل مش باين الدولة مفضلش منها إلا حبة شوم.. لو مش مصدق تعالي ع الميدان عاين ياناس مفيش حاكم إلا من خيال محكوم.. واللي هيقعد في بيته بعدها خاين اللي هيقعد كأنه سلم التانيين للأمن بإيديه وقاله هما ساكنين فين.. وصلت لضرب الرصاص ع الخلق في الميادين حتى الجثث حجزوها اكمنهم خايفين.. يامصر أصبحنا أحياء وميتين مساجين فاللي هيقعد في بيته يبقى مش مفهوم.. واللي هينزل الهي حارسه صاين يامصر هانت وبانت كلها كام يوم.. نهارنا نادي ونهار الندل مش باين. نهارنا نادي وبايدينا علي فكرة.. الصبح عنده فضول راح نعمل إيه بكرة. إيده علي الباب وخايف يلمس الأكرة.. ادخل ياأستاذ براحتك والبلد حرة. إحنا زهقنا نشوف الصبح من برة.. ادخل وخرج بقايا العتمة بالمرة. الناس ديه حرة وجنود الأمن مضطرة.. ياصبح طلعت روحنا لجل تيجي ياخي. طالعين نجبيها أهو فى كل حارة وحي.. حتى لو ضربونا بالرصاص الحي. شوف المداين كدة مفروشة خلق وضي.. دايما مفاجأة ودايما وقتها معلوم. الحكم لينا وليك الحق يامداين.. يامصر هانت وبانت كلها كام يوم . نهارنا نادي ونهار الندل مش باين.. ياصف عسكر بدال الدرع شيلوة اثنين. 25 يناير ياشباب فاكرين.. كان فيه انجليز ووزير الداخلية تخين... كان عنده برضه عساكر زيكم جامدين. سابهم يموتوا علولا لم سأل فيهم.. كانوا شبهكم اساميكم اساميهم. ياعسكري البهوات اللي بتحميهم.. ممكن يردوا عليك لما تناديهم. ياعسكري أنا أصلي بس بستغرب.. لو لاقي تأكل وتشرب قوم ياعم اضرب. اضرب عشان الوزير من ضربتك يطرب.. لكن هتشتغل ايه لما الوزير يهرب. أما الشديد القوي القادر أبو القادر.. برميل تلامة نشع علي مصر من الآخر. لو شافته معددة تكتب ادب ساخر.. ثابت يقول للهرم ياكابتن اتاخر. ولم يزل معتقد ان الهرم هيقوم.. ادي الحجر والبشر قايمين ياسيد القوم. والدين هيترد ياللي عشت متداين.. يامصر هانت وبانت كلها كام يوم. نهارنا نادي ونهار الندل مش باين.. ده حكم أسرة ولا خوفو ولا خفرع. ولا وجع بطن يتعالج بزيت خروع.. عمل مسوجر بعيد عنك ولايطلع. جربنا فيه كل شىء ملقينا شىء ينفع.. ماطلعش بالأدوية جربنا ألف طبيب.. ولا بعطارة شيوخ ليهم بلح وزبيب. ولا بجحفل مغولى وضرب بالقباقيب. . عمل مسوجر وسفلي شغل تل أبيب. وشغل أمريكا متغلف وختمة عليه.. ضيف زارنا ياعم من غير دعوة لابس بيه. قعد 30 سنة مابيقولش قاعد لية.. والنية يديها لابنه النابغة بعديه. ويقول قضا وقدر بين البشر محتوم.. قولناله طيب ومين قال للقدر معلوم. واش عرفك يافخمتك بالذي كاين.. يامصر هانت وبانت كلها كام يوم.. نهارنا نادي ونهار الندل مش باين
Mar 25, 2011
هتسامحوهم ولا ايه ؟
لم افكر وقتها و لم اتذكر ماذا كان رد فعل غادة من الثورة المصرية او من الرئيس مبارك لأننى للأمانة كنت مذهول لأنى وجدت " اكونتها" و لأنى ايضا لا احب التفاخر بنفسى تذكرت انى كنت اشارك فى الثورة و كنت خاربها يعنى , و بالتأكيد جال فى ذهنى ما قالته غادة عن الرئيس مبارك و عن انه " الكبير بتاعنا " و لازم نحترمه و كدا , فضلا عن المظاهرة الى طلعت فيها لتأييد المخلوع قبل التنحى و هتافها " مش هيمشى .. مش هيمشى" .
و لتذكَُّرى هذا الموقف البشع الذى اتذكر معه فيلم "غبى منه فيه" لما يوحى لى بالغباء و التخلف و عدم الاهتمام بأرواح الشهداء قررت ان " اكنسل" الاضافة و لتذهب غادة عبد الرازق هى و " اكونتها " للجحيم و ليذهب كل من كان فى صف المخلوع للجحيم .
نظريا كل الناس او معظمهم يكره غادة و كل رفاقها من الخائنين و لكن عمليا اتوقع ان هذا الكره لن يدوم طويلا لدرجة ان لو غادة نزلت بفيلم جديد تمارس فيه دورها المعتاد " المومس",غالبية الناس هتروح السينما و تتفرج عادى وكأن شيئا لم يكن , و هنا السؤال يطرح نفسه : هل سيتم مسامحة كل من أخطئوافى حق الثوار و فى حق ثورتنا المباركة ؟ ام سيتم مقاطعتهم و مقاطعة اعمالهم التافهة التى لم تعجبنى قبل الثورة و حتى لو استمرت بعد الثورة لن تعجبنى .
نعلم جميعا ان غادة انشأت صفحة على فيس بوك لكى تبرر موقفها و تقول " انا كان قصدى انهم بيغلطوا فى الرئيس اللى هو راجل كبير فى السن و لازم الناس تحترمه " و لكن الصفحة لاقت هجوما شديدا و دعنى اذكرك ان هذا الهجوم هو من شباب الفيسبوك و لكن ماذا يكون رد فعل شباب الشارع و الناس العاديين ؟.
الخيار مفتوح امام الشعب المصرى لتحديد العقوبة المناسبة و تمنياتى ان تكون عقوبة رادعة لكل من اخطأ فى حق الشعب .
Mar 23, 2011
اشياء لا اجد لها سبب
و اذا اردنا التحدث عن حكومة د. عصام شرف فلن تجد اختلاف عن موقف المجلس العسكرى فلم تتم ايضا اقالة باقى رموز الفساد و المتمثلة فى رؤساء الجامعات الفاسدين و المجالس المحلية و بعض المسؤولين الفاسدين فى الوزارات و ضباط امن الدولة الذين تم القبض عليهم و لم يتم التحقيق معهم بعد فلماذا هذه الوتيرة البطيئة فى التعامل مع مطالب الثورة , انها ثورة و تستلزم السرعة فى القضاء على الفساد حتى لا يجمع شتاته مرة اخرى .
ان ما حدث بالامس من حريق نشب فى مبنى الاتصالات فى وزارة الداخلية يؤكد ان جهاز امن الدولة الفاسد لا تزال يده تعمل فى الخفاء و تدبر المكائد و " الخوازيق " لكى تزعزع استقرار البلاد و هنا يأتى السؤال هل لا يزال جهاز امن الدولة يعمل بأسلوبه القذر القديم ؟ و هل لا يزال العادلى يأمر و ينهى ؟ .
و من جهة اخرى و حول زعزعة الاستقرار يأتى فى ذهنى مباشرة نتيجة التعديلات الدستورية و لكن دعنا نتكلم عن الاعلان الدستورى الذى سيصدر , فأنا اتسائل ايضا عن ما فائدة الاستفتاء اذا كان سيصدر ذلك الاعلان الدستورى الان فكان من الممكن ان نكتب دستورا جديدا و يكون فيه المواد المعدلة و يعرض الدستور للاستفتاء كاملا او على المواد المهمة منه و لكن اللى حصل حصل .
و تباعا لنتيجة الاستفتاء و التى كانت "نعم" فتجد هؤلاء الشيوخ من امثال ااستاذ محمد يعقوب يقول لقد انتصرنا فى "غزوة الصناديق" و كأنها كانت حرب و يقول " اللى مش عاجبه ان مصر تبقى اسلامية يروح امريكا " هذا الانسان المتخلف ذهنيا لا يعجبه المسيحيين مثلا او لا يريد ان يمنحهم حق الحياة فى مصر , ما هذا العقل المتخلف و الجاهل و المتعفن , لقد رأيتم من يصنع الفتنة الان فانا اطالب بمحاسبة هؤلاء الاغبياء الذين يلعبون على وتر الدين و يخلطون الدين بالسياسة .
و الله الموفق
Mar 21, 2011
الواد محروس بتاع الوزير
بعيدا عن التعديلات الدستورية و بعيدا عن " نعم" و "لا" و بعيدا عن الفريقين الذين ذهبوا للاستفتاء و عن الذين اعتقدوا انهم انتصروا على رموز العلمانية و رموز الكفر فى اعتقادهم و بعيدا عن ما حدث للبرادعى من تعدى و ضرب و قذف بالحجارة و " قلة ادب " و تشويه للصورة و انتقام غير مبرر السبب و بعيدا عن "الكوسة" التى رأيناها نتيجة الاستفتاء و هذه المهزلة التى لا تصدق و لكن خلينا ندخل فى موضوعنا .
الواد محروس بتاع الوزير , طبعا كلنا عارفين فيلم عادل امام و محروس دا كان دلدول اوى للوزير ,الثورة قامت لكن لا تزال هذه الشخصية موجودة و متأصلة و راسخة فى الاشخاص القريبين من الوزراء امثال السكيرتير و كدا يعنى , يعنى مثلا عندما كان حسنى مبارك - الله يجحمه - يذهب الى الانتخابات او الاستفتاء لابد و انت تجد بجانبه رجل "حامل المنديل" و مهمة حامل المنديل تكمن فى انه يعطى الرئيس المنديل بعد ان يغمس صابعة فى الحبر الفسفورى لم نرى هذا فى امريكا او فى اوروبا , هذا التخلف موجود عندنا و بس .
الكلام دا قبل الثورة لكن مازال موجود بعد الثورة فترى عندما ذهب عمرو موسى الى المقر الانتخابى لازم يكون فيه واحد جانبه بيقوله اتفضل ياباشا و بيتاخر الناس من حواليه ! هو ليه كدا يا ناس يعنى قلنا ثورة و بتاع علشان كل الحاجات دى تختفى لكن مفيش فايدة فى اشخاص معينة من الشعب .
مثلا لما كنت فى الاستفتاء ( اللى انا شخصيا بعتبره كوسة بكل مافى الكلمة من معنى للكوسة ) لقيت واحد شاب لابس بدلة نازل على السلم و نازل ادامه راجل زى الفراشين كدا مع احترامى الكامل و الاكيد للفراشين المهم الفراش لقيته بيقول وسعوا يا جماعة للباشا فا قلتله باشا مين يعنى ؟ , قاللى سيادة المستشار رايح الحمام , فا انا استغربت يعنى هو المستشار دا رايح الحمام و الراجل دا نازل معاه عشان يمسكله المناديل برده ؟؟
الظاهرة دى بتستفذنى اوى تماما زى ظاهرة ان الناس تقول لسواق التاكسى و السباك يا بشمهندس بحس وقتها باحساس " قذر لا يصدقه عقل " و زى ظواهر كتيرة احنا لازم نبطلها او اغلبنا لازم يبطلوها منها كلمة "باشا" مع ان البشوية اتلغت من زمان و كمان لازم تتلغى من قاموسنا من النهاردة .
Mar 18, 2011
اسباب تخليك متقولش نعم
أنت بتقول "نعم" على التعديلات الدستورية ليه ؟ * خايف من البلطجية و عايز أ...من و استقرار ؟ السيطرة على البلطجية من اختصاص وزارة الداخلية , إيه علاقة الداخلية بتغيير الدستور ؟ هي "نعم" حتخلي البلطجية يروحوا ؟... * الاقصاد بايظ و البلد بتقع ؟ الاقتصاد من اختصاص وزارة المالية و الصناعة و التجارة . إيه علاقة دول بتغيير الدستور ؟ * مؤقت و حنعمل دستور جديد ؟ و منعملش دستور جديد من دلوقتي على طول ليه ؟ * عشان حياخد وقت طويل ؟ فقهاء الدستور و دكاترة القانون قالوا ان التعديلات دي تاخد كام ساعة , و قالوا ان عمل دستور جديد كامل لا يأخذ أكثر من 7 جلسات , يعني أسبوع , نديهم شهر كمان عشان الاطمئنان , فين الوقت الطويل ده ؟ * في ناس قالوا ياخد سنة و نصف ؟ و ياخد سنة و نصف ليه ؟ هما مش بيألفوه من دماغهم زي الرواية , دول مجرد بينقلوا من دساتير عالمية و قديمة , إيه بقى اللي يستدعي سنة و نصف ؟ * أصلهم عدلوا المواد الضرورية بس ؟ و هو تقليص صلاحيات الرئيس مش ضرورية ؟ أمال الثورة كلها قامت عشان إيه ؟؟ * ما هم حيقلصوها بعد كده في الدستور الجديد ؟ و مقلصوهاش معاهم في التعديل بالمرة ليه ؟ هو مش تعديل بتعديل ؟ اشمعنى دي ؟؟ * ليه نقبل بدستور مترقع فيه مواد متعارضة مع بعض ؟ لا مفيش تعارض ؟ أصل الدستور كله معطل لكن الحزء المعدل بس هو اللي البلد حتمشي به ؟ و بالنسبة للمواد الخاصة بالصحة و التعليم و ما إلى ذلك ؟ معطلة بردو ؟! البلد كلها حتمشي 6 شهور بمواد خاصة بالرئاسة و الحكم و البرلمان فقط ؟؟؟ * ليه أعمل انتخابات برلمانية الأول و الأحزاب لسة ملحقتش تتكون ؟ عشان الإخوان و الوطني بس هما اللي ياخدوا مقاعد ؟؟ * ليه أنتخب رئيس و أخليه يقسم على دستور مترقع ؟ ينفع تروح تشتغل في شركة و تعمل شغل لمديرك و بعدين تبقوا تكتبوا العقد بعدين بقى على مهلكم و على رواقة ؟ تضمن منين إن المدير ده مش حياكل عليك حقك ؟؟ * فتحي سرور كان في لجنة تعديل الدستور ليه ؟ * الحزب الوطني موافق على التعديل ليه ؟ و ماشي يوزع منشورات على الناس عشان يوافقوا ليه ؟ * تفتكر ليه نادي القضاة مش موافق على التعديلات دي ؟ مش ده شغلهم ؟ مع احترامي لكل اللي قال "نعم" بس مش القضاة أدرى بالصح و الغلط في الموضوع ده ؟ ينفع تبقى عيان و كل الدكاترة شايفة انك لازم تعمل عملية , ييجي محامي يقول لك خد الدوا و حتبقى كويس ؟؟ لو جاوبت على كل الأسئلة دي اجابات مقنعة لك قبل ما تكون مقنعة لي , روح يا سيدي قول "نعم" بضمير مستريح
منقول
الاخوان و السلفيين
موافقة الاخوان و السلفيين على التعديلات الدستورية ليس لأنهم يريدون الحفاظ على المادة الثانية من الدستور فلو انهم يريدون الحفاظ عليها الان و لو صوتوا بنعم فأنه ستجرى انتخابات مجلس الشعب و سيتم انتخاب لجنة تأسيسية لوضع دستور جديد و سيتم مناقشة المادة الثانية فى ذلك الوقت و لكن اذا اجريت الانتخابات البرلمانية فى ذلك الوقت نحن نعلم ان الكتلتين المنظمتين حاليا هما الاخوان المسلمين و الحزب الوطنى و لا نضمن ان يحصل الاخوان على اغلبية فى مجلس الشعب القادم و ان حصلوا عليها فأن من حقهم تشكيل اللجنة التأسيسية لوضع الدستور الجديد فبذلك سيقوموا بتشكيل دستور يليق بهم و " الترزية موجودين " و سوف يحافظون على المادة الثانية و سيعمل الدستور ايضا لخدمة مصالح الاخوان فقط لأنه وضع فى ظل لجنتهم التأسيسية التى لن تمثل الشعب طبعا لأن الشعب علمانى بأعتبار تفكير الاخوان و السلفيين و ربما نكون كفار ايضا بالنسبة اليهم .
الجمعية السلفية بالاسكندرية اصدرت بيانا بضرورة النزول للاستفتاء و الموافقة على التعديلات الدستورية حيث ذكروا فى بيانهم (تحث الدعوة السلفية جموع الشعب المصرى عامة - و ابناءها خاصة - على المشاركة و التصويت بالموافقة على التعديلات الدستورية المطروحة للاستفتاء بتاريخ 14 ربيع الثانى 1432 هجرية , الموافق 19 مارس 2011 ميلادية .
و ذلك بناء على ان فى هذه المشاركة الايجابية اعمالا لما تقرر فى الشرع الشريف من السعى فى تحصيل المصالح و تقليل المفاسد قدر الامكان و الله من وراء القصد. )
لا ادرى متى اصبحت الموافقة على التعديلات الدستورية فى الشرع , المصيبة ان الاخوان و السلفيين يقولون ان بعض الائمة و المشايخ قد افتوا بضرورة الموافقة على التعديلات الدستورية , ما هذا الهراء و الاستخفاف بعقول الشعب انا لا ادرى و لا اعرف اذا كان هناك نص فى القرأن او هناك شىء ما فى الشريعة الاسلامية تحث على الموافقة على التعديلات الدستورية فلم يكن فى عهد الرسول او الصحابة دستور اصلا , او انهم خائفين من تغيير المادة الثانية فكيف يضمنون اننا لو قلنا نعم للتعديلات ان هذه المادة لن تتغير الا لو كانوا هم اغلبية فى مجلس الشعب و هذا هو مبتغاهم من التعديلات الدستورية ان يكونوا اغلبية ليس الا .
من يقول ان الاخوان المسلمين يريدون دولة ديمقراطية فهذا هراء فكيف يحققوان الديمقراطية و هم يريدون الناس ان تسير كلها فى تيار واحد و ان يوافقوا كلهم على التعديلات المطروحة ؟ , اننى ارى ان هم يريدون تحويلنا الى دولة دكتاتورية او استكمال مشروع الدولة الدكتاتورية مرة اخرى .
و ان كانوا يريدون الحفاظ على المادة الثانية فنحن سوف نحافظ عليها ايضا مسلمين و مسيحيين و قد صرح أ\ جورج اسحق بهذا كما نعلم ان هناك كثير من المسيحيين يريدون الحفاظ على المادة الثانية و يلجأون اليها احيانا فى المحاكم الاسرية لاختلاف الطوائف احيانا و لا ادرى كيف يفكرون حيث ان من سيضع الدستور الجديد سوف يكتبه على اساس الاغلبية الموحودة فى الدولة و هى المسلمون فالضرورة ستلزمه على ابقاء المادة الثانية .
السلفيين ايضا يقولون ان الذى يجعل الرئيس طاغية هو طول فترة الحكم حيث انهم رؤوا ان التعديلات قد جعلت الفترة اربع سنوات , فقد تركوا كل صلاحيات الرئيس و ركزوا فى طول فترة الرئاسة , ما هذا الفكر " التعبان اوى " .
و لنذكر ايضا ان بيان الدعوة السلفية قبل ثورة 25 يناير كان يحرم الخروج فى المظاهرات و كان سببهم المقنع جدا هو خشية حدوث فتنة بين ابناء الشعب يعنى احنا خارجين كلنا ضد الرئيس و سبحان الله هتحصل فتنة بيننا , برغم انهم هم الذين احدثوا الفتنة فى احداث كنيسة اطفيح , فقد تركوا واجب الخروج لمقاومة الظلم و ركزوا على الفتنى انا شايف ان الناس دى اتفه من انها تطلع بيانات و تقرفنا فى حياتنا .
الامر الغريب ايضا انهم يريدون بشدة ان يكون الرئيس القادم جده مصرى و زوجته مصرية حيث لا تتغرر بنا دول العالم و يقودنا الرئيس المشكوك فى امره الى الاحتلال و الاستعمار , فى هذه الحالة قد اثبتوا انهم عنصريين اكثر من النازيين انفسهم فأنهم يركزون على نقاء العنصر , لان ذلك سوف يضر بالبلاد فى وقت تتربص فيه دول العالم بنا , فكيف يقولون ذلك و قد اصبح اوباما الاسود ذو الاصل الافريقى و جده مسلم ان يكون رئيس للولايات المتحدة الامريكية ؟ هل انتم مثلا عباقرة و تفكرون احسن من بتوع امريكا يعنى ؟؟ كيف تمنع شخص مثل د. احمد زويل و د. محمد غنيم من الترشح للرئاسة بمجرد زواجهم من غير مصريات .
انا اريد كافة الشعب المصرى ان يفكر جيدا فى اختياره فى التعديلات و ان يرى ما فى مصلحة الوطن اولا .
Mar 17, 2011
Mar 15, 2011
حظ عاثر فى حياتى
−الحياة قصيرة جدا و معرفتها تحتاج الى وقت قصير ( هيبوقريطس ) .
−الحياة قصيرة جدا فاحرص على معرفة ما يدور حولك و الا ستحسر لحظات لن تتكرر ثانية ( بتاعتى انا ) .
اود انا اتجه الى شق معين و هو " الحياة قصيرة جدا فاحرص على معرفة ما يدور حولك " هذه المقولة من الممكن ان تصيبك و تصيبنى بالتوتر فانت لست بخمسين عين لكى ترى كل ما يحدث امامك فى العالم او فى بيتك على الاقل و تصيبك بالخوف ايضا لانك لن تستطيع مراقبة كل ما يدور حولك و تشعر انك تنطلق الى المجهول .
الانسان فى المتوسط يعيش حولى 75 عاما اى 27375 يوما هل هذا الرقم كبير ؟؟ لا اعتقد ذلك و انا لا اود ان اصيبك بالتوتر و الاكتئاب و لكن الحياة تجرى بسرعة شديدة جدا لا نتخيلها , و حديثا فأننا نلاحظ هذا فى هذه الايام حيث يروى اجدادنا ان الحياة لم تكن سريعة فى ايامهم , تجد هذا الرقم قليلا نسبيا حيث لا تستطيع ان تحقق باقى احلامك ( مع العلم ان الانسان طماع بطبعه و بيموت من غير ما يحقق باقى احلامه طبعا ) و اذا كنت من اصحاب الحظ العاثر فأننا نتكلم عن احلامك كلها و ليس بعضها .
بغض النظر دعنا ندخل فى الموضوع ( دغرى ) .
من جهة اخرى ماذا لو كنت الاخير فى كل شىء او فى شىء تود الحصول عليه بشدة ممكن يكون حلمك الذى تود ان تحققه بحيث يقولون لك ( احنا شطّبنا خلاص ) و ان تكون هذه اخر فرصة لك للحصول عليه , ما هذا الحظ العاثر " اللعنة ! " كما يقولون ترجمة الافلام .
و النماذج كثيرة فى نظرية " الحظ العاثر فى تحقيق الفرصة المنشودة " ( بتاعتى بردو) مثلا من الممكن ان يحالفك هذا الحظ العاثر فى ليلة زفافك -الليلة التى ينتظرها كل شاب - فتوافيك المنية و انت على باب غرفة النوم , فسبحان الله عزرائيل لم يجد شخصا " لائقا للموت " غيرك انت , ما هذا النحس الاسود فأنت بانتظار ليلة العمر بس مش مكتوبالك يا معلم , لا بجد " سحقا !" .
ممكن ان تكون لاعب كرة قدم مصرى و جامد قوى يجيلك عرض من ريال مدريد و تقبل العرض و هذا الحلم هو امل كل لاعب مصرى انت بتتكلم فى ايه يعنى دا ريال مدريد المهم , انت قبلت العرض طبعا و فجأة و انت فى العرض التقديمى- اللى بيعمله النادى لتقديم اللاعب الجديد - عزرائيل يزورك ( لااااااااااااااااااا حراااااااااااااااام ) طيب ليه كدا بجد يعنى العالم فيه حوالى ستة مليار واحد و بردو عزرائيل جابك انت من وسط الناس دى كلها " تبا !"
ممكن ان تكون مثل جمال مبارك و ماما بترتبلك الحكم علشان تشيل بابا و تمسك انت و خلاص الحلم ابتدى يتحقق تقوم تحصل ثورة ( ايه يا عم الحظ دا العيال دى فاضية ولا ايه ؟ ) حظ عاثر ايضا ربنا يكون فى عونك دلوقتى يا جمال دا ياريت على انك خسرت الحكم دا انت هتتحاكم كمان . عموما انت وش امك سمكة اصلا و انا فرحان فيك .
يتبع ....
Mar 8, 2011
أمن الدولة
مجنون من يعتقد او يفكر اصلا بأن جهاز امن الدولة لابد ان يستمر فى عملة مع تغيير بسيط مثل تغيير الاسم او اعادة الهيكلة او قصر نشاطه على الارهاب فقط و الامن القومى فهذا هراء غير مقبول اطلاقا حيث تحدث فى ذلك عدد من رجال الداخلية السابقين و الحاليين مثل مساعد وزير الداخلية السابق الذى اصبح وزير للداخلية فأنه يرفض اصلا فكرة ان الضباط هم الذين قاموا بحرق الملفات حيث يقول “ ازاى الظباط هم اللى حرقوها هى بتدينهم يعنى ؟ “ , فكيف تطلب من رجل بهذا الفكر البالى ايضا كالذين سبقوه ان يقوم بحل هذا الجهاز الذى لا توجد اى وظيفة له غير التجسس على المواطنين و اشاعة الرعب فى نفوسهم و اعتقال المواطنين الابرياء بدون وجه حق , لن اطيل فى شرح الاساليب لان كل مواطن يعرفها (دا كفاية انك تسمع اسم امن الدولة علشان تترعب ) .
لا احد منا يتصور مدى شيطانية عقول ضباط امن الدولة فى ترك هذه الوثائق التى من شأنها ان تثير الوقيعة بين الشعب مسلمين و مسيحيين و تثير ايضا الانقسام بين الشعب و بعض الصحفيين والاعلاميين الشرفاء الذين يقدره و يحترمهم الشعب لكى تحدث فتنة بين عناصر الشعب و لكى لا تستطيع ان تصدق احدا ممن يتكلمون عن الفساد او عن الحق .
الدليل على ذلك واضح فكيف تبرر عدم حرق كل الملفات مع انه كان هناك الوقت المناسب لذلك حيث ان يوما بأكمله كفيل جدا بحرق كل الملفات فى كل المقرات و لكن هم لم يقوموا بحرقها كلها فقد تركوا ملفات مزوة تدين بعض الشرفاء و تثير الوقيعة من العجيب اننا رأينا عثور البعض على ملف الرئيس المخلوع و لم يعثروا على ملف ابنه او ملف صفوت الشريف مثلا , و بعض هذه الملفات ربما يكون مكتوبا بعد التنحى ليحدث الفتنة و غيرها من الامور , و هناك ايضا بعض شرائط الفيديو التى لم تصاب بأذى بينما هناك ايضا شرائط مدمرة بالكامل فيكف تفسر لى ذلك ؟ هل لم يجدوا وقتا “ لسف “ هذه الشرائط ؟ لا يمكن ابدا .
من العجيب ايضا عدم العثور على اى من المعتقلين السابقين فى مباحث امن الدولة , البعض يقول انه قد قاموا بنقل هؤلاء المعتقلين الى اماكن اخرى باضبط كما نقلوا الملفات “الاصلية” الى اماكن غير معلومة ايضا ولا اعلم ايضا لماذا حدث ذلك ؟ هل لكى لا يعترف عليهم المعتقلين ؟ لا ادرى ! .
ان من يطالب ببقاء جهاز مباحث امن الدولة مع تغيير اسمه او اعادة هيكلته او اقتصاره على الارهاب و الامن القومى , من الواضح ان انه لا يعرف عما يتحدث ولا يعقل اصلا , كيف يبقى هذا الجهازمستمرا بعد كل ما عرفناه و بعد ما رأينا و سائل التعذيب و كيف نعلم اصلا انه يقتصر على الارهاب و الامن القومى فى حين ان جهاز امن الدولة يعمل فى سرية تامة لا يعرفها اى مواطن شأنه شأن المخابرات العامة فكيف تأمن على نفسك ايها المواطن مجددا بعد اعادة “ الهيكلة “ التى هى تغيير الشكل الخارجى فقط مع بقاء كل العناصر الداخلية , حيث سيبقى كل الضباط المتهمون فى التعذيب مجددا و سيبقى كل الموظفون و كأن شيئا لم يحدث ( بس احنا هنقول للظباط و النبى متعذبوش اخواتكوا المواطنين علشان بيزعلوا ) . هذا هراء و تخاريف اصحاب العقول المتعفنة من النظام السابق .
انا اطالب بحل هذا الجهاز و محاكمة كل من تعلق بالتعذيب و كل من أهان كرامة اى مواطن مصرى , انى اطالب بمحاكمتهم لكى لا يتركوا يعيثون فسادا فى البلاد حيث انهم قد تعودوا على هذا العمل البشع و لا يمكن ان يتخلوا عنه بكل سهولة حيث اصبحت هذه طبيعتهم و طباعهم التى لن تتغير .
و لكل من يخافون على الامن القومى و مكافحة الارهاب فمن الممكن انشاء مؤسسة مستقلة مثل المباحث الفيدرالية الامريكية و يكون كل العاملين بها من اصحاب مؤهلات عليا و غير عاملين بالشرطة بحيث يأخذوا دورات او من الممكن ايضا ان نحضر خبراء لتعليمهم حتى لا نقع مجددا فى عصابات اخرى تهين كرامة اى مصرى , فأننا لم نسمع قط بتعذيب المباحث الفيدرالية الامريكية لأى مواطن امريكى او غير امريكى , بل بالعكس انهم فى عهد الرئيس جورج بوش كانوا يحضرون من يريدون تعذيبه الى مباحث امن الدولة و يستنطقونه حيث ان التعذيب ممنوع فى الولايات المتحدة .
فى النهاية يجب ان اقول ان الشعب لن يهدأ الا بحل هذا الجهاز اللعين و محاكمة كل طاقمه الملوث بدماء المصريين الغالية و كفانا ثمانية و خمسون عاما نعيش تحت مظلة الرعب منذ مراكز القوى و حتى امن الدولة .
Mar 7, 2011
الجيش و الشعب ايد واحدة
منذ نزول الجيش الى الشارع المصرى فى مغرب يوم الجمعة 28 يناير و قد رحب الثوار بالجيش و هللوا و اطلقوا الصيحات و قالوا " الجيش و الشعب ايد واحدة " .
لا احد منا يستطيع أن ينكر العلاقة الوطيدة و الوثيقة بين الشعب و بين الجيش المصرى , فالجيش المصرى بمثابة الدرع الذى يقوم بحماية الوطن و الشعب و تتمثل مكانة الجيش فى الانتصارات التى حققها فى عام ,1973 فالجيش منذ ذلك الوقت له المكانة العليا فى قلوب المصريين بدليل الاستقبال الحافل الذى حظى به الجيش بعد نزوله الى شوارع القاهرة و باقى المدن بعد خطة الانسحاب المفاجىء للشرطة و لكى يعلن حظر التجول و يسيطر على البلاد .
قد نزل الجيش المصرى من قبل فى عهد السادات اثناء " انتفاضة الحرامية " كما اطلق عليها السادات , قد نزل الجيش لحفظ الامن فى الشارع المصرى و هذا ما يتوقعه منه الشعب المصرى , الامان و الحماية ضد اى خطر و هذا دور الجيش .
اريد ان اؤكد فقط اننى لا اقلل من دور الجيش فيما سأقوله و لكن انا فقط ابرز بعض مواقف حدثت و لا اريد ان احدث توتر فى العلاقة بين الجيش و الشعب.
احداث يوم الاربعاء " يوم موقعة الجمل " نعرف جميعا ما حدث فيها من تجاوزات و بلطجة الخ , و هناك سؤال يوجهه كثير من الناس عن هذا اليوم و هو لماذا يقوم الجيش دائما بتفتيش المتظاهرين قبل دخولهم الميدان و لماذا لم يقوم الجيش بتفتيش المؤيدين لمبارك " البلطجية " , و هذا السؤال يثير الجدل , انا اخاف ان اقول ان الجيش يتواطىء مع توابع و فلول النظام لأن الجيش هو القوة الوحيدة الموجودة فى مصر و هو ايضا الملاذ الوحيد فأذا خسرنا الجيش سوف نخسر الثورة فى اعتقادى الخاص .
من المواقف الأخرى التى من الممكن ان تظهر صورة الجيش بأنها ليست جيدة و هى حادثة امس فى " لاظوغلى " عندما هجم البلطجية على المتظاهرين الذين كانوا يريدون اقتحام مقر امن الدولة و لكن الجيش ايضا رأى الموقف و لم يحرك ساكنا فما تفسير ذلك ؟؟.
و بعد رحيل البلطجية استخدم الجيش العصيان الكهربية فى تفريق المتظاهرين بالقوة و اطلق الرصاص بغزارة فى الجو , و لعلك تتسائل ايضا لماذا لم يقوم الجيش بتفريق البلطجية فضلا عن تفريق المتظاهرين ؟ , هذا الموقف بين الجيش و البلطجية يثير تساؤلات كثيرة حتى بين المدونين على المواقع الاجتماعية الذين يرددون منذ امس " الجيش و البلطجية ايد واحدة " .
ايضا هناك موقف مهم جدا ربما لم يلاحظه الكثيرون و هو انه ربما الجيش هو الذى يملى على رئيس الوزاراء اختيار تشكيل حكومته , فقد صرح د . احمد شفيق فى برنامج "بلدنا بامصرى" ان الجيش طلب منه بقاء بعض الوزراء مثلما كان يفعل الرئيس المخلوع و حتى بعد رحيل مبارك نرى ان رئيس الوزراء مجبر على اختيار بعض الشخصيات , فأين هى الديمقراطية اذن ؟ و اين هى مبادىء الثورة ؟ , و انى اشك ان د. عصام شرف من الممكن ان يعانى من سيطرة الجيش و من الممكن ان نلاحظ ذلك فى بقاء بعض الوزراء الذين يرفضهم الشعب لانهم فاسدون و معروفين مسبقا و ايضا اعضاء فى الحزب الوطنى مثل " السيد مشعل " الذى رفضه الشعب بعد الاعلان عن الاسماء المرشحة للوزارة .
لماذا يستخدم الجيش هذا الاسلوب المتعفن مجددا " اسلوب التحكم و السيطرة " و لماذا يريد ان يبقى الاحتجاجات و يبقى الشعب فى الميدان يتظاهر بحقوقه ( نقول ثور يقولوا احلبوه ) ؟ هل هى فلول و ايدى النظام القديم مازالتتتحكم فى الدولة ؟ هل هناك قوى اكبر تتحكم ؟ , ام ان الجيش يريد من الثوار ان يستمروا فى الاعتصامات حتى تظهر الاصوات التى تطالب بعودة المحتجين الى منازلهم لأنهم يعيقون الحركة و يحدثون الزحام ( و بيعطلوا المصالح ) و كأن ميدان التحرير يعطل مصر كلها , و لأن الجيش يريد تسليم البلاد فى اسرع وقت ممكن لأن ليس مهمته القبض على الخارجين على القانون و غيرها من الوظائف المسئول عنها الشرطة الهاربة مثل الفئران .
هذه السرعة مفيدة فى حالة تكون مجلس رئاسى ( احدى مطالب الثوار ) فى هذه الحالة من الممكن ان نشكر الجيش على الرحيل حيث انه قد نفذ مطلب مهم و حيوى فى طريق تحقيق الديمقراطية التى ننشدها , و لكن اذا طلب الجيش السرعة فى اجراء انتخابات رئاسية عاجلة بعد ستة اشهر فهذا سيمنح الرئيس القادم نفس الصلاحيات و السلطات و هذا غير مقبول اطلاقا.
نهاية , لا اريد ان اشكك الناس فى الجيش و لكنى اذكر فقط بعض مواقف من الممكن ان تكون لها مدلول معين حيث تدعنا نفكر فى عمق عما يحدث حولنا و تدعنا ايضا نبذل كل جهودنا فى حماية الثورة , ثورة شعبنا العظيم