فى حاجة ميختلفش عليها اتنين انه مبقاش فيه ادب فى الدنيا ولا اخلاق , و الكلام دا ينطبق على اى حاجة فى مجتمعنا فى الايام دى حتى على الشحاذين او الشحاتين ( علشان بس لو حد سمعنى و انا بقول شحاذين ممكن يعملى حاجة وحشة ) الشحات بالانجليزى يعنى "beggar" لكن هل تعتقد ان الشحات فى الدول الاوروبية زى الشحات فى مصر دلوقتى وسط هذه الاحداث المتوترة فى الشارع المصرى منذ 30 عام , طبعا لا .
الشحات الاوروبى دا راجل محترم و مثقف و مقتنع بمبدأ " الاختلاف فى الرأى لا يفسد للود قضية "فهذا ال "beggar" ينتظرك فى محطات القطار او فى ازقّة الشوارع لكى تعطيه اللى فيه النصيب لكن هنا ممكن تلاقى الشحات نايم معاك فى اوضة النوم , و لكى اثبت لك ان الشحات الاوروبى كبقية شعبه مثقف و محترم , من الممكن الا يكون الشحات فقير و لكنه يرى فى هذه المهنة مستقبله و هوايته المفضلة و وظيفته التى طالما حلم بها منذ نعومة اظافره ما اود ان اقوله ان الشحاتة فى الدول المتقدمة هى غاية و ليست و سيلة للنصب او ما شابه .
الشحاتين الايام دى بقت اخلاقهم فاسدة و مش عاجبانى و بقت فيه كمية بجاحة مش طبيعية , يعنى مثلا لما الشحات يتراخم عليك و يقولك " حاجة لله يا باشا " و انت عارف انه بيستهبل اصلا و لكن هيكون حظ امك اسود لو مكانش معاك فكة غير نص جنيه مثلا و اعطيتها له , فى الحالة دى هناك احتمالين : الاول انه ممكن ياخد الفلوس و يهزقك شوية و يقولك " نص جنيه يا معفن ؟؟ هو انا بشحت منك ؟" لكن الاحتمال الاصعب انه ممكن يرمى النص جنيه اللعين فى وشك و يمشى , و فى نوع تانى بقا من الشحاتين و غالبا بتكون بنت او امرأة تجيلك بلطافة و ابتسامة تشوبها نظرة استغلالية وصولية بحتة متملقة و تقولك " مناديل يا باشا ؟ " و انت مش عايز مناديل يعنى , ساعتها يبقى يوم امك اسود( اكتر من لو مكانش معاك نص جنيه ) و تجرى وراك و تشدك من ايدك و تمسك التيشيرت و تبهدلك لحد ما تشترى منها المناديل .
راحت فين اخلاق الشحاتين الطيبين بتوع زمان و الشعار الجميل اللى معنتش بسمعه " حسنة قليلة تمنع بلاوى كتيرة و هنيالك يا فاعل الخير " من غير ما حد يتراخم عليك و من غير تعصب شحتوى و تملق و انقشاع ( و محدش يسأل يعنى ايه انقشاع ) .
انا بس عايز اسأل هيحصل ايه لو الشحاتين اخلاقهم ترجع زى زمان و كل شحات " رجل و مرأة " يحاولوا يغيروا من اسلوبهم الشحتوى لانى قد اصابنى الملل و الضجر من قسوة المعاملة التى القاها على يد الشحاتين , لذلك اناشد كل الشحاتين اصحاب القلوب الرحيمة ان يكونوا لطفاء معنا و اطالبهم بالاقتناع بحرية التعبير يعنى مش معنى انى مش عايز مناديل انك تجبرنى اخدها , فين بقى الديمقراطية اللى بننادى بيها .
حمى الله الوطن و المواطنين و الشحاتين
No comments:
Post a Comment